HNN. Warar dheeraad ah ayaa kasoo baxaya dagaalo xalay ka dhacay deegaanka Fax-faxdhuun ee Gobalka Gedo halkaasi oo ay ku dagaalameen ciidamada Dowladda Soomaaliya iyo kuwa Shabaab.Dagaalka ayaa ka dambeeyay kadib markii xoogaga Shabaab weerar ballaaran ay ku qaadeen ciidamada Dowlada Soomaaliya ee Gobalka Gedo gaar ahaan Deegaanka Fax-Faxdhuun.
Warfaa Sheekh Aadan oo kamid ah saraakiisha ciidamada Dowladda Soomaaliya ee Gobalka Gedo ayaa wuxuu sheegay in dagaalka uu ahaa mid ka dhacay gudaha Magaalada kadib weerar gaadmo ah oo Shabaab ay Magaalada ku qaadeen.
Wuxuu sheegay inay ka saareen ciidankii Shabaab ee soo weeraray deegaanka meeshii lagu dagaalamayna iminka ay gacanta ku hayaan ciidamada Dowladda Soomaaliya dagaalyahanada Shabaab ka tirsana ay ku raadjoogaan.
Si rasmi ah faah-faahin ugama uusan bixin khasaaraha labada dhinac kasoo gaaray dagaalkaasi laakiin wararka ayaa xaqiijinaya inuu jiro khasaaro labada dhinac soo kala gaaray.
Al-Shabaab ayaa kordhiyay muddooyinkaan dambe weerarada ay ku qaadayaan deeganada ka tirsan Gobalada dalka Soomaaliya oo ay ku sugan yihiin ciidamada Dowladda Soomaaliya
