Wararka Af Soomaliga Ah

Waraysi Dhinacyo Badan Taabanaya Oo Aan La Yeelanay Agaasimaha Fulinta ee Ururka Samafalka Ee READ/IQRA

Apr 08, 2014
Waraysi Dhinacyo Badan Taabanaya Oo Aan La Yeelanay Agaasimaha Fulinta ee Ururka Samafalka Ee READ/IQRA

Ururka  Waxbarashada Miyiga iyo Hormarinta ee magaciisa loo soo gaabiyo READ ama IQRA ayaa waxa uu ka mid yahay ururada samafalka ah ee ka hawl gala Somaliland, gaar ahaan gobolada galbeedka dalka, waxana uu ururkan oo la aasaasay sanadkii 1999kii uu si wayn ugu hawl galay meel marinta waxbarashada dadka ku nool goobaha miyiga ah ee gobolada Awdal Salal iyo Gabilay iyo hormarinta.

Waxqabadka ururkan READ amd IQRA ayaa waxa waxa uu noqday mid ku suntan degaanada uu ka hawl galo, waxana shabakada oo booqatay goobahaasi ay indhaha soo saartay dugsiyada uu ururkan gacanta ku hayo iyo ardayda tirada badan ee u hamuunta qabta waxbarashada ee ururka READ ama IQRA ku dhiiri galiyo habeen iyo maalinba ka midho dhalinta himilooyinka waxbarashada aasaasiga ah, iyo hormarka kale ee ka muuqda degaanadaasi.

Xaalka sidan ah ayaa waxa uu soo jiitay warbaahinta waxana shabakadu si ay ugu kuur gasho hawlaha shaqo iyo waxqabad ee ururka READ amd IQRA ay waraysi la yeelatay Agaasimaha Fulinta ee Ururka READ ama IQRA Md. Muumin Xuseen Cige, waxana ay ugu horayn shabakadu waydiisay bal inuu warbixin ka bixiyo hawlaha ururka uu Agaasimaha ka yahay?

Agaasime Muumin oo gacanta ku haya warbixino qoran oo koobsanaya waxqabadka ururka  ayaa hadalka bilaabay waxana uu yidhi “Ururka READ ama IQRA , runtii waa urur Samafal ah oo ujeedada loo aasaasay ay ahayd inuu gacan ka gaysto sidoo loo hormarin lahaa dhinaca waxbarashada ee umadda ku nool Goboladda Awdal, Gebiley iyo Salal, mudadii uu ururku jiray  wax weyn oo taariikh-gal ah ayuu qabtay, ilaa haddana ka qabtaa hormarinta waxbarashada aasaasiga ah ee goboladaasi iyo guud ahaan hormarka, waxa la isku raacsan yahay ku baraarugsanaanta ahmiyada waxbarashada ee dadka ku nool dhulka miyiga ah ee degaanadan, iyo helitaanka agabkii waxbarashada ee sida dugsiyada, macalimiinta iyo agabkii kale ee waxbarashadu u baahnayd inuu ahaa mid  aad u hooseeya oo aan ku filnayd dadka,ama aan meelaha qaar jirinba intii ka horaysay sanadkii 2000 oo ururka READ ama IQRA uu hawlahiisa ka bilaabay degaanadan,  waxana ay taasi saamaysay  xagga tirade dadka ee degenaashaha tuulooyinka goboladaas iyo guud ahaan Horumarkaba”

Agaasime Muumin oo hadalka sii wata waxa uu yidhi “Wixii xiligaas ka danbeeyey, kuna suntan sanadkii 2000 iyo hanaqaadkii ururka  READ ama IQRA, waxa sanad kasta dugsiyada Hoose/Dhexe  ee ku yaal deganadaasi soo gala tiro arday ah oo u dhaxaysa 1000-1500, waxana la xusi karaa in arintan guusha ahi ay ku timid iyada oo ururku bulshada dhex galay isla markaana qaaday olole balaadhan oo wacyigalin ah oo bulshada ku dhaqan miyiga loogu sheegayo ahmiyada ay leedahay waxbarashadu, sidoo kalena dugsiyo cusub oo badan uu ururku aasaasay ama boodhka laga jafay dugsiyadii naadirka ahaa degaanadaasi ka jiray, iyada oo macalimiin la qoray, lana gunneeyay, agabkii kale ee aasaasiga ahaa ee waxbarashadana loo unkay, si dugsiyadu u noqdaan kuwo soo saara ardaydii loo baahnaa oo waxbarashadoodu wanaagsan tahay”

“Marka aan arinta isku soo duubo maanta tirade ardayda ah ee ku jirta dugsiyada uu ururka READ ama IQRA  aasaasay waxa ay dhantahay 2530 arday oo heerkoodu isugu jiro Hoose iyo Dhexe, waxana hubaal ah in talaabadaasi tahay mid guul ah, marka la barbar dhigo xaalku sida uu ahaan jiray ee dadka ku nool deegaanada miyiga ah ee gobolada Awdal, Salal iyo Gabilay aanay dugsiyada H/Dhexe fursada u helin ama aanay jirin arday dugsiyo gasha wixii ka dambeeyay sanadkii 1960kii” ayuu yidhi Agaasime Muumin

Markale Agaasime Muumin isaga oo ka jawaabayay Su’aal ahayd bal inuu sharaxaad ka bixiyo samaamaynta ay dugsiyada uu ururka READ ama IQRA yagg-leelay ay ku yeesheen nolosha idadka iyo hormarka degaanka ayaa waxa uu yidhi “Waa run oo dusiyada waxbarashada ee la aasaasay waxa ay noloshii dadka reer miyiga ahayd ku yeesheen saamayn xooggan, isla markaana TABAN (+ve) oo dhinaca nolosha iyo hormarka ah, tusaale ahaan, waxa ay dugsiyada la aasaasay salka u dhigeen noloshii dadkii reer guuraaga ahaa ee miyiga, waxana ka barbar samaysmay dugsiyadaas Tuulooyin iyo Degaamo cusub oo ma-guurto noqday maanta kuwaas oo aan hore u jirin, degaanadaas cusub, waxa koroday tiradii dadka ahaa ee ku noolaa, waxana ay soo jiiteen degaamadaas samaysmay hayadihii kale ee bulshada ama xukuumada ama caalamiga ahaa, waxana qasab noqotay in xarumo caafimaad, rugo booliis, ceel biyoodyo iyo adeegyo kale oo muhiim ah loo dhiso”

“Dhinaca kale markii ay dadkii noloshoodu isku bedeshay mid ma-guurto ah, waxa ay barteen inay qotaan beeraha, gaar haan beer-biyoodka oo dadka si wayn u anfacay, dalag ay quutaan ama mararka qaar iibgeeyaana ay kala soo bexeen, waxa furmay ganacsiyo yaryar oo xawli ku socda oo dadkii ka samaysteen degaanadaas samaysmay, waxana hubaal ah inay maanta noqdeen deegaano badan oo ururka READ ama IQRA aasaaskoodii si dadban saamayn ugu lahaa illo-dakhli oo xukuumadu ay ku tashato” ayuu yidhi Agaasime Muumin.

“Ma aha intan oo kaliya ee waxa aan xusi karaa in dugsiyadii uu aasaasay ururka READ ama IQRA ay maanta yihiin goobo ay dadku codkooda ka dhiibtaan ee waqtiga doorashooyinku jiraan (Polling Station), waxana ay tani ku tusaysaa in degaamadaasi ku yaala dhulka miyiga ahi ay maanta yihiin kuwo lagu tashado oo saamayntooda leh, siyaasiyiinta, xukuumada, axsaabta qaranka iyo shaqsiyaadka leh damaca hogaamineed ee dhinaca siyaasaduba ay tirsadaan oo aanay indhaha ka qabsan karin, waxaas oo dhamina waxa hubaal ah inay si dadban iyo si toos ah uga dhasheen dadaalkii ururka READ ama IQRA, qofkasta oo caqli u saaxiib ahi waa uu garanayaa, taariikhduna way ka marag-kacaysaa arintaas” ayuu yidhi Agaasime Muumin.

Agaasime Muumin oo tusaale ka bixinaya degaanada dhismay ee uu sheegayo iyo midhaha ururka READ ama IQRA ee dhaxal galka noqday waxa uu yidhi “Tusaale ahaan degaanadaas waxa ka mid ah Degaanka GEB oo maanta cammiran, waxana uu degaankaasi ku dhashay  midhihii ururka READ ama IQRA gaar ahaan aasaaskii Dugsiga Sare ee GEB ee hoygga ah oo ay maanta ku jiraan 130 arday oo wiilal iyo gabdhoba isugu jira, kuwaas oo 40 ka mid ahi ay sanad dugsiyeedkan 2013/2014 qalinjabinayaan”

Agaasime Muumin oo hadalka soo ganaanadaya ayaa waxa uu u mahadnaqay cid walba oo gacan ka gaysatay waxqabadkaas dhaxalgalka ah ee uu ururka READ ama IQRA qabtay, waxa kale oo uu carab dhebay in baahida taala dhulka miyiga ah ee uu gobolada Awdal, Salal iyo Gebilay ee uu ururku ka hawl gala aanay wali dhamaan waxana uu yidhi “Hawlo badan waxa ay u baahan yihiin in la sii hinjiyo, sababta oo ah baahidu ma dhamaato, ama ma jirto meel taariikhda la odhanayo baahidaasi waxa ay ku dhamaatay meeshaas ama waxa ay dhamaanaysaa waqtigaas, waana hubaal in mudo kooban ay shaqadii ururka READ ama IQRA gaabatay, sababo yaryar oo jira aawadood, balse wixii ka dambeeyay bishii December 7deedii sanadkii 2013, xafiiskii guud ee ururku si fiican ayuu u shaqeeyaa, si kadarta yare ee ururka  hortaal maanta looga talaabsadana waxa aan si xushamd, qadarin iyo wadaniyad ah uga codsanayaa cidwalba oo taageeri jirtay ururka READ ama IQRA inay halkeedii ka sii wado, taageeradaas wax ku oolka ah ee uu ururku maanta u baahan yahayna waxa ay iskugu jirtaa Maskaxdii, Muruqii, Maalkii iyo Ducadii uu ururku ku hawlgalay ee taariikhda wax ka badalka lama ilaawaanka ah ku sameeyay”

“Beertii aan beernay ururka IQRA-na udub-dhaxaadka u ahaa midhaheedii wuu bislaaday marka laga eego dhinacyada badan ee la xidhiidha nolosha Aadamaha, ayuu hadalka ku soo afmeeray Agaasime Muumin Xuseen Cige. 

Wixii Talo Iyo Tusaale Ah Noogu Soo Dir heemaalnews@gmail.com

Submit to DeliciousSubmit to DiggSubmit to FacebookSubmit to Google PlusSubmit to StumbleuponSubmit to TechnoratiSubmit to TwitterSubmit to LinkedIn
WakhtigaSalaada Sxa

Somali Films

Mirqaanka Iyo
Ilaahay Umadiisa Part V
Ilaahay Umadiisa U Nabad Gali Sooraan Iyo Jawaan Part V
Ilahay Umadiisa Par IV
Axda Geedka Dhacaya